LYRIC / PARODDI / PARULLE / CANTI

Nu i mumenti più chieti
Quand’ellu spunta l’albore
L’estru di centu pueti
Versu a muntagna corre
Palesa i so sicreti
È svela u so splundore

Sparghje u sole d’inguernu
A so dilicata fiara
È abbraccendu l’eternu
Si disceta l’alta sarra
Matrimoniu più serenu
Di u celu è di a tarra

Stende i so primi raggi
Intricciati di dulcezza
È si stinzanu i larci
Per gode ne a carezza
O per sente i so basgi
Calà si nantu a cresta

Ci porghje a zilifrina
Di Monte Cintu u fiatu
Trave l’aria marzulina
Sin’à Capu Tafunatu
Mentre u sole camina
Nu u celu spurgulatu

Ribombanu e terzine
Ch’elle cantanu e fate
Indu e valle turchine
È e punte innargintate
Altiere cum’è regine
Di neve incurunate

U sole chì si lamenta
Quandu lu ghjornu finisce
Per licinzià si lenta
Purpurine e so strisce
A muntagna s’addurmenta
Annanata da e spisce


Accumudatu by

Stephane Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.