LYRIC / PARODDI / PARULLE / CANTI

U me paesi hè qui à l’attichju d’un scalu
U mari longu canta in a marina spenta
Chi mondu purtarani i matini di ventu
Chi brama o chi turmentu

U mari longu inticcia è pienghji una sirena
S’azzinga u migranti à i sogni di rena
In cerca d’una sponda un focu senza guerra
Pur’una lenza incerta o un anghju di terra

In un mondu c’ùn sà
Trà moghi o falsi rè
Trà l’essa o l’avè
Ci sarà sempri un cantu

Ci sarà sempri un cantu
Da scioglia l’addisperu
Un innu o un lamentu
Da richjarà u ventu

Da parà a miseria s’inalzanu i muri
Miditarraniu hè sciancu è dici u frastornu
Da l’altu di i me lochi sona l’ingratu cornu
D’una paura torna

Miditarraniu vechju da la to ribba in fondu
Ci balla u migranti a goffa tribisonda
Di tanti passi immersi à li guai annudati
Chi u punenti ingordu piglia senz’avè datu

In l’isula c’ùn sà
Trà marosu è marina
Trà l’onda è a ruina
Ci sarà sempri un cantu

Ci sarà sempri un cantu
Una via una spera
Un innu o un lamentu
Da richjarà u ventu


Accumudatu by

Stephane Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.