LYRIC / PARODDI / PARULLE / CANTI

À Anton’Francescu Filippini

Issa lingua di i mei grazia à voi fù quella
Chì incantava le sere di a mio zitellina
Issa lingua di i mei grazia à voi fù bella
Quant’un’alba di maghju, un sfogu d’albaspina

Trà noi ci fù lu mare è u tempu chì u face
Trà noi li bisesti di e guere orrende
Ma ci fù da fà ponte a musa ch’ùn si tace
E parolle di focu, e splendite lucende

Pienghje u murianincu u so figliolu persu
Pienghje a Corsica sana quellu chì si n’andò
In paese di Dante à mantene u versu
Di quellu di una volta, quelli antichi maiò.

Qualsiasi lu locu, u fiume, u paese
Ch’è vo travirsarete in sonniu dopu vita
E brame di u meiu à e vostre sò appese
Da fà compia sta notte chì dura senza lita.

Marcellu Acquaviva
A Filetta


Accumudatu by

Cyril Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *