1

Sumiglie

D’amore sò novi’ssi mumenti
Fiori d’eternu
Cum’è stampe sicrete in lu ventu
D’ogni quarternu.

Coppiu novu quand’è tu nasci
Da fà ballà e to stagione
Hè un suppu di tè ch’è tu lasci
In lu versu d’ogni canzona.

Di basgi sò colme’sse ghjurnate
O la magia
Tù chi tant’anni l’ai allisciate
Di puesia.

Quandu nascenu e famiglie
Per scrive listessa storia
Di tante altre anu a sumiglia
Carche di seculi è di mimoria.

Di strade sò i nostri ricordi
O stonde care
Scrite per sempre trà è sei corde
D’una ghitara.

Quand’è tù campi d’amicizia
Da tant’anni cusi prufonda
Certi ghjorni ai a scimizia
D’arrubati ancu u mondu.

Dede Nobili \ Ghjuvan’Michele Armani
Chjami Aghjalesi.