1

Sperà

Sperà in la matina ch’accarezza le piane
Quandi l’ore beate à noi sò affiancate
Accumbraccià la vita cum’è un amicu caru
Eppo spazzà quelli chi memoria ùn anu.

Sperà in quella voce chi dice di marchjà
Per isse stradacce scure chi si stendenu quallà
U ghjornu imbalsamatu ellu ùn ti sbaglierà
Chi ùn face nice è dice a verità.

Sperà quandu l’amore ùn hè più ch’è u sangue
A mente brusgiata ghjè colma di fanga
Di tuttu issu scumbugliu a vita sbuccerà
E lu ricordu luminosu ci purterà.

Sperà in ogni locu d’issu paese eternu
Si piserà lu sole per l’omi di curagiu
E la notte mai più spazzerà l’amore
Di tutti li nostri oramai in pace.

Sperà u core apertu à u dulore
In to fieru surrisu cum’è sola cunfina
E poi fin’à l’ultimu soffiu sperà
In tè chi ùn possu più chjamà.

Sperà quandu l’amore ùn hè più ch’è u sangue Bis
A mente brusgiata ghjè colma di fanga
Di tuttu issu scumbugliu a vita sbuccerà
E lu ricordu luminosu ci purterà.