Per U Troppu

Per ste famiglie stirpate
A l’entre di un mondu novu
Per e terre abbandunate
Duve più nisunu si move
Per tanti chi sò cascati
Sbagliati da u to stracciu
Ti stupu in faccia.

Per sta lingua pruibita
Chi sapia tante fole
E i zitelli insischiti
A e porte di e scole
Per a lingua ch’oghje scrivu
E a via ch’ella traccia
Ti stupu in faccia.

Per sti battelli vituperii
A u mutà di e stagione
Per l’inghjulia è a miseria
Chi sò in le mio canzone
Per u core chi si stringhje
Ghjuntu l’ultimu dispacciu
Ti stupu in faccia.

Per e to bugie infame
I to soldi è e to tarre
Per quelli morti luntanu
E tanti ch’è tengu cari
Per a forza chi ci tene
In un siculare abbracciu
Ti stupu in faccia.

Per e stantare muderne
Chi di a guerra sò spechji
E per e stonde d’infernu
Ch’elle contenu à i vechji
Per u mio figliolu natu
Chi mi spalanca bracce
Ti stupu in faccia.