Lingua libertà

In lu mare quallà
Ci stà a Corsica
Paradisu di benestà
Duve si pò cantà
Duve si pò parlà
Una lingua chì face sunnià

Una lingua chì và
Una lingua chì sà
Fassi sente quind’è quallà
È finch’ella serà
A feremu viaghjà
In lu mondu senza piantà

Parlate avà
È fate parlà
Fatela campà
In bocca vostra
Lingua libertà

Hè un fiore chì s’apre
Nant’à tutte le lapre
Sò parulle in quantità
Di sturiette è di fole
È d’inguernu è di sole
Hè liberu lu so andà

Si sà a debulezza
È si sà cun certezza
Ch’ella hè sempre à salvà
Interessu cumunu
Hè di tutti è d’ognunu
Demuli un novu campà

Parlate avà
È fate parlà
Fatela campà
In bocca vostra
Lingua libertà

Ragione di luttà
E ragione di sta
Cum’un simbulu da francà
Ancu quellu chì a sà
È chì mutu ùn pò stà
Hè da sparte è da amparà

Da li tempi à andà
O Corsu ùn ci scurdà
In paese o in cità
Di falla ribumbà
È di falla schiattà
Cum’un frombu d’identità

Parlate avà
È fate parlà
Fatela campà
In bocca vostra
Lingua libertà