1

L’Annuzietta

Un sò riccu ma ùn ci hè male
Aghju ciò chi mi ci vole
Casgiu carne oliu è sale
La vi dicu è ùn contu fole
Pane d’orzu è di granone
In veru micca in canzone.

La mio casa hè picculetta
Fatta à usu paisanu
Ci hè una cucina una stanzetta
Duve cum’un capitanu
Ci dormu nant’un lettinu
Di crespu senza cuscinu.
La mio stanza hè ben’guarnita
D’ogetti d’altu valore
Una zucca d’acquavita
Ch’eo carezzu à tutte l’ore
U baschicciu c’un muschettu
Poi Tumasgiu sott’à u lettu.

A finestra unica è sola
Senza vetri hè sempre stata
Cum’un soffru mai di gola
Eiu la tengu spalancata
Ch’entre l’aria fresca è sana
Quandu tira a tramuntana.

Ma d’ogetti ùn sò spruvistu
Tutt’hè tenut’à nivellu
Ci hè una paghjola è un filtru
Poi un spetu è un macinellu
Una pignatta in terra fina
Una fattoghja è una casgina.

Ma si sa ch’indè stu mondu
Un ci hè ch’angoscia è malavoglia
Cun ciò ch’eo pussedu è facciu
Un possu truvà una moglia
Per fattu i male furtuna
Donna ùn n’hè trovu manc’una.