Cenni Di Vita

Il suffit parfois de poser son regard sur les choses les plus simples de la vie de tous les jours, pour y voir des images d’une poésie infinie.

Un bracciu chì ci s’avvinghje
Quandu l’amore c’inguccia
A pratellina chì sbuccia
Un filu d’acqua chì finghje

U muscu di ghjemma nova
U cantu losciu d’un fiume
Un nidu cù cinque piume
È un’acella chì cova

Un nizzulime nucente
Un veculu chì trinneca
Ch’una mamone azzeca
Cù a nanna ch’omu sente

Una nivaghja chì scola
Fendu cresce a vadina
Una voce zitellina
Ind’un’accinta di scola

L’omacu d’un fumaghjolu
L’alba d’un scuru ch’ingringa
Un versu chì ci s’azzinga
L’apa nant’à u tigliolu

Soprà a porta fiurita
A lumera chì vacilla
U pichju di qualchi squilla
Sò tutti cenni di vita

L’omacu d’un fumaghjolu
L’alba d’un scuru ch’ingringa
Un versu chì ci s’azzinga
L’apa nant’à u tigliolu

Soprà a porta fiurita
A lumera chì vacilla
U pichju di qualchi squilla
Sò tutti cenni di vita

GhjuvanPetru Ristori \ Stéphane Ancey
Vitalba